Kalaallit Nunaannut, Kalaallit Nunaannit Klaallit Nunaannilu usinik imaatigut assartuineq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut
pillugu
Inatsisartut Attaveqarnermut Pilersuinermullu aamma
Ineqarnermut Ataatsimiititaliaata
ISUMALIUTISSIISSUTAA
allannguutissap aappassaaneerneqarnerani saqqummiunneqartoq
Inatsisartut Attaveqarnermut Pilersuinermullu aamma Ineqarnermut Ataatsimiititaliaat suliarinninnermini ukuninnga inuttaqarpoq:
Inatsisartuni ilaasortaq Lars Sørensen, IA, siulittaasoq
Inatsisartuni ilaasortaq Per Rosing-Petersen, Siumut
Inatsisartuni ilaasortaq Peter Grønvold Samuelsen, sinniisussaq, Siumut
Inatsisartuni ilaasortaq Godmand Rasmussen, Atassut
Inatsisartuni ilaasortaq Mogens Kleist, Kattusseqatigiit
Inatsisartut Attaveqarnermut Pilersuinermullu aamma Ineqarnermut Ataatsimiititaliaata UKA 2001-imi siullermeerinerup kingorna siunnersuut nassuiaatitai ilanngullugit misissuataarpaa.
Isumasioqateqarluni ataatsimeeqateqarneq
Siunnersuutittaaq suliarineqarneranut atatillugu ataatsimiititaliap Aningaasaqarnermut Naalakkersuisoq Josef Motzfeldt isumasioqatigalugu ataatsimeeqatigaa.
Siunnersuutip imarisai
Siunnersuutikkut siunertarineqarpoq usit imaatigut assartorneqartut Kalaallit Nunaannut, Kalaallit Nunaannit imaluunniit Kalaallit Nunaanni namminermi assartorneqarnerisa assartuinermi akiligassartaasa procentianik aalajangersimasumik akitsuusiussap Inatsisartunit assigiinngiiaartumik aalajangiiffigineqarsinnaanissaata tunngavissiuunneqarnissaa.
Tamatuma kingorna akitsuusiinermut procentit Inatsisartut, Inatsisartut ukiumoortumik aningaasanut inatsisaanni oqaasertaliussatigut, aalajangersartassavaat.
Ataatsimiititaliap paasivaa 2002-mi Inatsisartut aningaasanut inatsisissaattut siunnersuummiKalaallit Nunaannut usinik assartuinermut akitsuusiinermut procenti 9,82%-iusussatut annertussusilerneqartoq, Kalaallilli Nunaanni Kalaallillu Nunaannit assartuinermut akitsuusinermut procenti 0%-iusussatut angissusilerneqarluni.
Ataatsimiititaliami amerlanerussuteqartut, tassalu Siumut, IA, Atassullu, siunnersuummut isumaqataapput, inassutigalugulu siunnersuut akuersissutigineqassasoq.
Ataatsimiititaliami ikinnerussuteqartoq, tassalu Kattusseqatigiit ilaasortaatitaat siunnersuummut tunngatillugu oqaatigaa, Avannaanut, isorliunerusunut nunaqarfinnullu aningaasatigut kinguneqaatissat misissuiffigineqarsimanngitsut.Taamaammat ikinnerussuteqartup inassuteqaatigaa siunnersuut itigartinneqassasoq.
Taama oqaaseqarluni Inatsisartut Attaveqarnermut Pilersuinermullu aamma Ineqarnermut Ataatsimiititaliaata aalajangiiffigisassatut siunnersuut aappassaaniigassanngortippaa.
Lars Sørensen,
siulittaasoq
Per Rosing-Petersen Godmand Rasmussen
Peter Grønvold Samuelsen, sinniisussaq Mogens Kleist